Американскиот милијардер и поранешен градоначалник на Њујорк, Мајкл Блумберг се повлече од претседателската трка во САД. При соопштување на одлуката, тој истакна дека во наредниот период ќе даде поддршка на неговиот демократски колега и екс потпретседател на САД, Џо Бајден. Веста за прекинот на претседателската кампања на Блумберг ја потврди и британскиот јавен сервис „Би-Би-Си“.

Со неговото повлекување, трката за претседателски кандидат во Демократската партија се сведува на двајца кандидати – Џо Бајден и Берни Сандерс. Блумберг во организација на кампањата потроши 500 милиони долари свои пари, но не успеа да добие поддршка од дел од гласачкото тело со симпатии кон Демократите. Тоа му појде од рака во само една сојузна држава.

Ова беше првпат за еден од најпознатите Американци да учествува во предизборна трка, со надеж дека тој ќе излезе на мегдан на Доналд Трамп на изборите во ноември. А, токму Трамп се потсмеваше на Блумберг по објавување на т.н. „прајмарис“ резултати. Актуелниот американски претседател на Твитер напиша „Мини Мајк е најголем губитник. Фрли милиони долари во канализација“.