Предлог деталниот урбанистички план (ДУП) за Мал Ринг што денеска го презенетираме, не е направен за нешто да се протурка, туку да отстрануваме дел по дел од проектот „Скопје 2014“. Мора да одиме чекор по чекор, рече градоначалникот на Општина Центар Саша Богдановиќ на јавната презентација за предложениот ДУП. Тој истакна дека на планот се работи повеќе од една година, а сите работи што се преземени, се направени точно и прецизно, без да се направи каква било штета.
„Клучна работа во сите постапки беше да го вратиме во управување државното неизградено земјиште, особено за делот Мал ринг, односно поврзано со проектот „Скопје 2014“. Во изминатиот период се изнаслушав дека сакаме да легализираме делови од „Скопје 2014“. Со новиот предлог план се прави спротивното, почнува да се стопира и да се брише се она што било зацртано во тогашнио проект Скопје 2014“, рече Богдановиќ.
Во пресрет на денешната презентација, вчера Асоцијацијата на архитекти на Македонија (ААМ) побара од градоначалникот на Општина Центар, Саша Богдановиќ и претседателката на општинскиот совет Цветанка Симобовска да го повлечат и преработат Предлог детaлниот урбанистички план. Според ААМ, станува збор за објекти и земјиште во државна сопственост и објекти кои во својата срж, во најмала рака се спорни, поради што сметаат дека за ваков предлог-план нема потреба од јавна презентација и јавна анкета пред спорните објекти да бидат исфрлени од планот.
Со предложениот план, велат од ААМ, се дава потврда и реафирмација на изградениот, но како што велат што е уште пострашно на неизградениот дел од проектот „Скопје2014“, од кој ова здружение се огради уште кога беше презентиран и бараше негова институционална ревизија.