Изградба на нова населба над Трнодол ќе нема, порача градоначалникот на општина Карпош, Стефан Богоев при денешната посета на Влае 2 за селекција на отпадот. Притоа тој нагласи дека соседната населба Жданец воопшто не е опфатена со Деталниот урбанистички план (ДУП) кој, како што рече, бил максимално транспарентно претставен во изминатиот период. Таквите вести ги окарактеризира како „лажни и политички конструкции и манипулации пласирани од поединци за лични или партиски мотиви“.

„Согласно барањата на граѓаните на Трнодол од летово, ние се согласивме да одржиме нова јавна презентација и нова јавна расправа за предложениот ДУП. Од утре започнува нова јавна презентација по претходно направена јавна анкета, што значи утре нема да се носи Деталниот урбанистички план. Како градоначалник на Карпош имав средба со седум претставници од населбата, на која присуствуваше и претставник од Град Скопје, како и стручни лица од Општината од која произлегоа барања на граѓаните што ние ги прифативме за што постои и уреден записник. Сите граѓани кои ќе градат согласно позитивните законски прописи, се должни да направат геомеханички истражувања на земјиштето, и доколку има потреба да постават шипови (бетонски статички конструкции), за да се направи стабилизација на земјиштето“, нагласи Богоев.

Општина Карпош ќе организира повторна Јавна презентација и Јавна анкета по предлог Деталниот урбанистички план за Градска четврт Ј03, блок 7, за делот околу Трнодол. Анкетата што е во тек, ќе трае до 27 декември во 2019 година, секој работен ден од 8 до 18 часот, во УЗ „Кузман Јосифовски Питу“ (ул. „Стрезово“ бр.7) со цел да се овозможи транспарентен и отворен процес, при што ДУП-от ќе биде изложен за граѓаните и по завршување на работното време на администрацијата.