Петтиот ден расправа за импичмент на претседателот Ѓорѓе Иванов, иницијатива покрената од пратениците на СДСМ, а поддржана од пратеничката група на ДУИ и независните пратеници, освен аболицијата, се фокусира и на вчерашниот голем протест на Шарената револуција.
Пратеникот на СДСМ, Стефан Богоев, во говорот пред своите колеги, побара од како што рече, чесните пратеници на ВМРО-ДПМНЕ да се одважат и да гласаат против криминалот, како историска шанса да се тргнат од прангите на контрола на ВМРО-ДПМНЕ.
Тој во својот говор посочи и на т.н бомби кои ги обајвуваше опозицијата, а кои индицираат на криминал и злоупотреба на службената должност на екс-министрите Миле Јанакиески и Гордана Јанкулоска за време на изборите, преку кои, рече Богоев, Иванов станал нелигитимен претседател и “фикус“ од кој се срамеле граѓаните.
На ова реагираше пратеникот Димитар Стевананџија од ВМРО-ДПМНЕ, кој се налути на епитетите од Богоев наменети за Иванов.
Стевананџија му замери на Богоев дека бил лошо воспитан и ги идеализирал лидерите на СДСМ, Бранко Црвенковски и Зоран Заев и ја поддржувал Шарената револуција, која патем вели била платеничка, која ги рушела институциите кои биле столб на државата.