Најголемот, најбрзиот, „човекот молња“, сопственик на светскиот рекорд што уште долго ќе биде актуелен заминува од атлетската „Формула 1“ со бронзен медал. Јусеин Болт го освои третото место во последната „стотка“ во кариерата. Круната на спринтерот од Јамајка ја симнаа Американците Џастин Гетлин и Кристофер Колмен пред околу 60.000 гледачи на олимпискиот стадион во Лондон.
„Ме уби лошиот старт. Обично се подобрував од квалификации до финале што овојпат не беше случај. Затоа и загубив. Немав сила. Малку ги стигнав во втората половина од трката, но бев премногу здрвен. Едноставно се случува. Не бев вистинскиот кога требаше“, коментира Болт кој на тартанот во Лондон беше за 0,03 секунди побавен од неговиот децениски ривал.
За Гетлин, пак, победата во Лондон значеше и прва светска титула по СП во Хелсинки во 2005 година. По минувањето на целната линија Американецот, наместо аплаузи, доби свирежи од гледалиштето што беше случај и при излегувањето на тартан од поттрибинскиот простор и при претставувањето крај стартните блокови. Причина беа двата позитивни допинг теста од минатото што му донесоа и суспензии што публиката со односот покажа дека не заборава.
„Се оглушив на свирежите и останав концентриран. Тие што ме сакаат, навиваа за мене. Загубив доста трки од Болт во последните години, а сега го победив во неговиот последен настап на 100 метри. На патеката сме противници, надвор од неа се шегуваме и добро се забавуваме. По трката ми пријде и ми шепна на уво дека не ги заслужив свирежите“, изјави Гетлин кој на публиката по трката ѝвозврати со прст на уста по што му пријде на Болт, клекна пред него како почит за сите остварувња се поздрави со Болт по трката, клекна на колена и се поклони пред ривалот од Јамајка.
Болт се повлекува од трките на 100 метри со три златни мундијалски одличја од Берлин во 2009 година, од Москва во 2013 година и од Пекинг во 2015 година. Шанса за пензија со златен медал на градите ќе има наредната сабота во штафетната трка 4х100 метри.