Манчестер јунајтед потврди дека се договори со Кристијано Роналдо за сензационален кам-бек на „Олд Трафорд“, откако раководствата на „црвените ѓаволи“ и на Јувентус нашле заеднички јазик за трансфер на Португалецот.
Петкратниот освојувач на „Златната топка“, според англиските медиуми, се очекува да потпише двегодишен договор под услов да добие виза и да ги мине задолжителните лекарски прегледи. Јунајтед, пак, се согласи првично да ѝ плати два милиони евра на „старата дама“ плус до три милиони евра како бонуси.
Манчестер сити, до петокот, се чинеше како најверојатна следна дестинација во кариерата на Роналдо, меѓутоа по 48 часовните разговори на неговиот агент Мендеш, преселбата на „Етихад“ стана невозможна мисија. Ситуацијата кулминира со пресврт во, речиси, последен час, па Португалецот, кој ја започна кариерата во Спортинг Лисабон за потоа за рекордни 80 милиони евра во 2009 година да ја прифати понудата на Реал Мадрид, сега, на огромно задоволство да прифати да се врати во Јунајтед, чиј дрес го носеше шест сезони во минатото.
Манчестер Јунајтед е среќен што може да потврди дека клубот постигна договор со Јувентус за трансфер на Кристијано Роналдо, под услов да се договорат лични услови, виза и медицински прегледи, сподели клубот од „Олд Трафорд“ на Твитер.
Welcome , @Cristiano #MUFC | #Ronaldo
— Manchester United (@ManUtd) August 27, 2021
Кристијано Роналдо е петкратен освојувач на „Златната топка“, досега има освоено над 30 големи трофеи во кариерата, вклучувајќи пет титули во Лигата на шампионите, четири светски клупски првенства, седум титули во Англија, Шпанија и Италија, а со репрезентацијата на Португалија го освои и Европското првенство во 2016 година.
За време на шестгодишниот престој во Манчестер јунајтед, тој постигна 118 гола на 292 натпревара. На Роналдо му остануваат помалку од 12 месеци од актуелниот договор со Јувентус, вреден околу 31 милион евра по сезона.