Барселона ќе биде следна наредна дестинација во кариерата на Антоан Гризман. Дел од шпанските медиуми дури пишуваат дека е постигнат и начелен договор меѓу Каталонците и Атлетико Мадрид за услугите на францускиот репрезентативец на „Камп Ноу“. Според нив, трансферот вреден 100 милиони евра би требало да се реализира наредното лето.
Гризман летоска го продолжи договорот со тимот од „Ванда Метрополотано“ до 2022 година. Притоа беше подигната и висината на откупната клаузула од 100 на 200 милиони евра, но нејзината важност се однесуваше само на летниот преоден рок.
Весникот „Ел Мундо Депортиво“ пишува дека ниту Атлетико нема против разделба со Французинот од причина што оваа сезона е под нивото од претходните и досега потпиша само три гола. Гризман пристигна во Мадрид во 2014 година од екипата на Реал Сосиедад за 30 милиони евра.