Борис Бекер е префрлен во затвор кој се користи за притворање странски криминалци, што укажува дека ќе биде депортиран од Велика Британија на крајот на казната. Според Тајмс, адвокатот на Бекер им рекол на новинарите во Берлин дека тој бил префрлен во затворот Хантеркомб во Оксфордшир.

Поранешниот светски тенисер број 1 беше однесен во затворот Вандсворт, затвор од Б категорија, откако беше затворен на две и пол години бидејќи прикрил имот од 3  милиони евра за да избегне да ги плати парите што ги должи по неговиот банкрот.

Бекер (54) живее во Велика Британија од 2012 година, но нема британско државјанство. Неговиот адвокат потврди дека тој е сега во затворот за странци. „Борис Бекер денеска беше префрлен во затворот Хантеркомб. Тоа е затвор од категорија Ц, што значи дека има ниско ниво на безбедност“, изјави тој.

Последната инспекција во затворот Хантеркомб во 2017 година покажа дека од 197 мажи ослободени од затворот, 185 биле веднаш депортирани.

Бекер ќе влезе во групата за автоматска депортација бидејќи е странски државјанин без британско државјанство кој добил затворска казна од повеќе од 12 месеци. Бекер, кој има 12-годишен син Амадеус, со неговата сопруга Шарли „Лили“ Бекер со која живее раздвоено, може да поднесе жалба против депортацијата.

Бекер беше осуден според Законот за несолвентност и беше прогласен за виновен за четири обвиненија од страна на поротата на крунскиот суд во Саутворк минатиот месец, но беше ослободен од дополнителни 20 обвиненија во врска со неговиот банкрот во 2017 година. Казната затвор за тие дела може да изнесува и до седум години.

Тој беше осуден на двегодишна условна казна за даночно затајување и обид за даночно затајување во вредност од 1,7 милиони евра и во Германија во 2002 година. Осврнувајќи се на таа пресуда, судијата рече: „Не го послушавте предупредувањето што ви беше дадено и шансата што ви бешедадена со условната казна и тоа е значително отежнувачки фактор“. (Гардијан)