Во емисијата „Топ Тема“ на Телма, лидерот на Обединети за Македонија, Љубе Бошкоски, одговарајќи на прашањата на новинарот Чомовски, вели не е задоволен од тоа што човекот за кој најмногу се залагал да биде на чело на ВМРО-ДПМНЕ е 10 години на власт.
Коментирајќи ја изјавата на лидерот на ВМРО-НП, Љубчо Георгиевски дека се кае што Груевски ја предводи партијата, Бошкоски одговара:
„Сигурно дека Георгиевски не е задоволен за тоа што Никола Груевски дојде како негов наследник а не сум ни јас од тоа што 10 години владее во Македонија“.
Тој уште објасни дека бил најактивен за номинирање на Груевски за претседателското место во ВМРО-ДПМНЕ. Верувал дека идеологијата ќе им ја остави на вистинските Вмровци, а дека тој ќе ја дигне економијата на Македонија.
Прашан за тоа каде се разотидоа кога од Груевски беше пречекан како херој по враќањето од Хаг, Бошкоски мисли дека во него Груевски видел конкурент за првата фотелја во ВМРО-ДПМНЕ иако немал амбиции за тоа. Бошкоски потенцираше дека екс-премиерот од него побарал да не ги посетува општинските комитети на ВМРО-ДПМНЕ.
Меѓу другото, Бошкоски ја пофали и соработката помеѓу ВМРО-НП и Достоинство на Стојанче Ангелов.