Судот го казни новинарот Зоран Божиновски со 2.000 евра казна поради непочитување и непримерно однесување во судницата, за време на рочиштето во Основниот суд Скопје 1, на кое на Божиновски е обвинет за шпионажа, злосторничко здружување и уцена во случајот „Шпион“, но му се суди во одвоена постапка, како одвоен случај бидејќи живееше во Србија кога беше обвинет, а потоа и екстрадиран.
– Не илјада, туку 610.000 евра казнете ме. Јас ќе си кажам се што сметам дека е во моја одбрана. Не ви одговара тоа што го зборувам. Гладни сте за пари. Ова е лудница, не е судница. На 12 декември ќе снема пари во вашиот банкомат, и рече Божиновски на судијката Ленка Давитковска, за што му беше изречена казната.
На денешното рочиште кое траеше два часа, Божиновски долго ја објаснуваше својата одбрана и посочи дека случајот за кој го товарат е по нарачка на екс премиерот Никола Груевски и ВМРО ДПМНЕ.
Тој рече дека во обвинителниот акт немало докази дека тој бил шпион, ниту пак е напишано или имало докази за која држава работел, какви тајни документи имал, а уште помалку било напишано со кого контактирал. За сите три кривични дела за кои е обвинет Божиновски истакна дека се измислени од власта.
– Да имаа барем еден доказ против мене ВМРО одамна ќе ме осудеше на 10 години. Овој суд го сметам за злосторничко здружување и вас ве оценувам како дел од него како продолжена рака на Никола Груевски. За мојот предмет не може да биде надлежен овој суд и ОЈО кога предметот „Шпион“ е под надлежност на СЈО, рече Божиновски.
Божиновски беше опоменат и кога рече дека судот го смета за злосторничко здружување, а дека судијката е претставник на злосторничко здружување, кое е предводено од Никола Груевски.
-ДПМНЕ ме лови во две фази. Првата е од 1999 до 2002 година, по нивниот пораз на изборите кога нивното раководство нарача и изврши атентат врз мене во Куманово, кој го преживеав со тешки телесни повреди. Втората фаза е во јули 2006 година кога се вратија на власт и се обидоа да ме купат, но безуспешно. Сите обвинети во „Шпион“ сме следени од 2012 до 2013 година, рече Божиновски.