Ни поплавата “твитови” на Доналд Трамп повеќе не може да ги сопре протестите кои доаѓаат од целиот свет поради декретот со кој се затвораат границите на САД за жители на 7 муслимански земји.

Дури и неговиот претходник Барак Обама крена глас против оваа наредба. Кога замина од Белата куќа Обама рече дека нема да се меша во политичката дебата освен ако бидат доведени во опасност фунаменталните вредности во државата. И тоа се случи одвај 10 дена од заминувањето на Обама. Неговиот портпарол изјави дека “Обама не се согласува со дискримнацијата на индивидуи поради нивната вера или религија”.

Можеби уште полош сигнал за Трамп е падот на американската берза. Вол Стрит ја заврши сесијата со пад – Доу Џонс -0,61 отсто а Насдак -0,83 отсто. Ова е јасен сигнал дека на берзата не и се допаѓа начинот на кој владее Трамп и неизвесноста која ја носи во политиката. Познато е дека берзите сакаат стабилност па се чини дека медената месечина помеѓу Трамп и берзата завршува.

Многу големи компании како Епл, Микрософт, Нетфликс, Ербнб или Гугл кои вработуваат илјадници странци, сметаат дека декретот на Трамп е спротивен од американските вредности. Дури и банката Голдман Сакс, чии што екс директори денес работат за Трамп, ја критикуваа одлуката на претседателот.

Новиот домаќин на Белата куќа се обиде да го одврати вниманието на јавноста кон други теми и најави дека во вторник ќе го објави името на деветтиот член на Врховниот суд, највисоката судска инстанца во САД.

Но и за ова имаше протести. Стотици демонстранти се собраа пред судот скандирајќи дека не сакаат омраза, страв и “бегалците се добредојдени”.

Повеќе дипломати на САД протестираа исто така против наредбата преку официјален дипломатски канал кој го носи името “дисидент”. Тој канал им дозволува на вработените во министерството за надворешни работи да го кажат “искрено и со заштита на приватноста својот став пред нивната хиерархија”, изјави портпаролот на американската дипломатија Март Тонер.

Но, Белата куќа очигледно поинаку ги разбира работите:

“Или ќе ја прифатат програмата или нека си одат”, беше кусиот одговор од портпаролот на Белата куќа.

Министерот за правда на Државата Вашингтон поднесе тужба во која се бара итно стопирање на примената на наредбата на Трамп:

“Никој не е над законите па ни претседателот”, изјави Боб Фергусон.

Реакции имаше и во странство. Во Велика Британија петиција на 1.4 милиони луѓе бара од владата да ја откаже посетата на Трамп во оваа земја. Организациите за човекови права во Белгија го побараа истото од белгиската влада. Во Германија Ангела Меркел изјави дека борбата против тероризмот не оправдува генерализирање на сомнежот врз луѓе врз основа на нивната вера.