Крис Куомо, брат на поранешниот гувернер на Њујорк, Ендрју Куомо и водител на вечерна емисија на „Си-Ен-Ен“, е обвинет од негова поранешна соработничка за непристојно допирање.

Шели Рос, поранешна извршна продуцентка во „Еј-Би-Си“ го обвини Куомо за непристојно допирање за време на забава во 2005 година. Рос го опишува настанот во писмо објавено од „Њујорк тајмс“.

По случката, таа и нејзиниот сопруг, кој го забележал тоа, веднаш заминале од забавата. Во писмото таа ја става под знак прашање моралноста, искреноста и компетентноста на Куомо, правник по занимање и познат водител на вечерно политичко ток шоу на „Си-Ен-Ен“.

Понатаму во писмото таа ги истакнува мобингот, сексизмот и лабавата етика на медиумските организации во САД и раскажува дека била подложна на сексуални уцени на почетокот на својата кариера. Посочува дека „Си-Ен-Ен“ како работодавец му дава платформа на Куомо да „дели часови по морал и етика“, додека тој работел како советник на неговиот брат во време кога тој беше обвинет за сексуално малтретирање од неколку жени и го советувал да се брани. Под притисок на скандалите поврзани со ова Ендрју Куомо неодамна си даде оставка од гувернерската функција.

„Не сакам Куомо да стане наредна жртва во оваа ужасна приказна што продолжува. Се надевам тој да остане во „Си-Ен-Ен“ засекогаш, ако сака. Тоа што барам од него е новинарско каење. Да покани гости во емисија кои ќе зборуваат за сексизмот, за малтретирањето и за половите предрасуди на работното место“, пишува Рос.