Дали од утре Велика Британија повеќе нема да биде членка на ЕУ или ќе одлучи да продолжи да ја дели европската авантура со своите 27 партнери?
На прашањето денес одговараат 46,5 милиони британски гласачи по долга и интересна кампања. Неизвесноста на гласањето е речиси тотална иако вчера анкетите покажуваа дека Брегзит ќе победи со 45 отсто додека оние кои рекле дека сакаат да останат во ЕУ биле 44 отсто. Но, анкетите велат дека 10 отсто од гласачите вчера се уште не знаеле како ќе гласаат.
Денес цела Европа е во исчекување. Резултатот на референдумот ќе има големи последици на целиот континент без оглед дали Британците ќе гласаат “за” или “против”.
Според анализите, излегувањето на Велика Британија од ЕУ би донело пад од 10 д0 30 отсто на британската фунта и пад на внатрешниот бруто производ од 2 до 4 поени.
Последиците се разбира ќе ги почувствува и ЕУ. Излезот на Велика Британија ќе значи голем економски и политички неуспех на ЕУ.
Во случај на Брегзит во Европа може да се отвори Пандорината кутија на национализам и еврофобија. Популистите во Европа веќе имаат успех (Франција, Шведска, Данска, Холандија, Полска) кај гласачите и можни се нови референдуми за излез на земјите членки од ЕУ. Накусо, Велика Британија, ЕУ но и целиот континент, во случај на Брегзит, влегуваат во зона на неизвесност.
Во текот на кампањата се случи ужасното убиство на пратеничката Џо Кокс од страна на приврзаник на екстремната десница. Таа се залагаше за останување на земјата во ЕУ и вчера требаше да го прослави својот 42 роденден.
Резултатите на референдумот ќе бидат познати доцна вечерва или утре наутро. Гласачките места затвораат во 22 часот по локално време. Броењето на гласовите во оваа островска земја секогаш трае подолго а националната изборна комисија треба да излезе со конечните резултати утре. Главните медиуми одлучија да не прават анкета на излезот од гласачките места поради најверојатниот тесен резултат. Првите резултати би требало да ги соопшти Би-Би-Си околу 4 часот на наутро.
Веднаш по Втората светска војна, францускиот генерал, а подоцна и претседател, де Гол, го прашал Черчил какви се неговите намери во однос на Американците. Черчил, тогаше премиер на Велика Британија, одговорил: «Секогаш кога ќе треба да бираме помеѓу Европа и други хоризонти, ние ќе го избереме другото».
Британците денес ќе одговорат дали оваа реченица се уште е на сила.