Дваесет и седумте земји членки на ЕУ немаат намера одново да преговараат со Велика Британија за договорот за нејзиното излегување од Унијата, изјави денеска портпаролката на Европската комисија, Мина Андреева.
– Договорот постигнат на 25 ноември е најдобриот и единствено можен. Не може да стане збор за предоговарање, нагласи Андреева.
Според најавите, Долниот дом на британскиот Парламент утре треба да гласа за постигнатиот Договор за Брегзит, но Би-Би-Си, повикувајќи се на извори во Даунинг стрит, јави дека премиерката Тереза Меј го откажала гласањето.
Откажувањето на гласањето засега не е официјално потврдено, но за попладнево е најавено вонредно обраќање на Меј пред Парламентот посветено на Брегзитот.
Пред обраќањето на Меј, закажана е вонредна седница на британската Влада посветена на „следните чекори во процесот на Брегзит“.
Лондонскиот весник „Сандеј Тајмс“ уште вчера објави дека се очекува Меј да го одложи утрешното гласање во Парламентот за Договорот за Брегзит, по што ќе замине за Брисел за да напрви последен обид да ја убеди Европската унија за подобри услови во договорот за излез на Велика Британија од ЕУ, со цел да добие поддршка од пратениците.