Првото патување во странство на американскиот претседател Доналд Трамп ќе трае 7 дена и ќе го води во Саудиска Арабија, Израел, палестинските територии, Ватикан, Италија (каде што се одржува состанок на Г7) и Брисел на самит на НАТО.

Ова прва патувањо на важни места на кои Трамп треба да се сретне со важни соговорници и да испрати значајни пораки, се случува во не баш најдобар момент кога Белата куќа се наоѓа среде куп проблеми околу врските на изборната кампања на Трамп и Москва.

Денес во Ријад Трамп склучи договор за продажба на оружје на Саудиска Арабија во вредност од 110 милијарди долари.

Не знаеме каква е атмосферата во другите земји во кои патува Трамп, но Белгија на чело со Брисел се влезени во вистински турбуленции. Не е лесно да се дочека претседателот на САД и да се обезбеди беспрекорно функционирање на безбедносните и протоколарните служби а истовремено животот и сообраќајот во престолнината да се одвиваат без поголеми застои. Особено кога повеќе организации најавуваат протести за време на престојот на Трамп за да му стават на знаење дека не е добредојден во Европа.

Освен Трамп, во Брисел доаѓаат и канадскиот премиер Џастин Трудо но и сите премиери и претседатели на земјите членки на НАТО.

Но, Американците не ги оставаат домаќините сами да се мачат во оваа исклучително напорна и одговорна задача. Пред секое доаѓање на американски претседател, месец дена претходно стасува цела армија претставници на Белата куќа, на разузнавачките служби и на војската на САД.

Секоја сала во која претседателот треба да влезе или помине е микроскопски истражувана од страна на американските безбедносни служби. Се испитуваат телефонските линии, се бира која болница би требало да стапи на сцена доколку нешто му се случи на претседателот, се испитува патот по кој ќе помине претседателскиот автомобил…

Цел на оваа долга и детална подготовка е решавање на секој можен проблем пред претседателот на стапне на белгиско тло.

Познато е дека американските претседатели патуваат со познатиот авион Ер Форс 1 со десетици советници, тајни агенти и новинари, со посебен авион доаѓа персоналот од Белата куќа а со воен авион сите подиуми од кои Трамп ќе држи говор како и блиндираното возило на претседателот.

Со посебен авион доаѓа и блиндираната кола на претседателот наречена “Sвер”

 

Се мора да биде под конец и посетата не смее да има ниту најмал пропуст. Сепак, многумина стравуваат дека Трамп и неговата вербална опуштеност би можеле да донесат гафови за време на изјавите и разговорите со високите политичари. И држат среќа тоа да не случи.

Тајните агенти истовремено не дозволуваат несакани лица да му пријдат на претседателот дури и ако тие лица се дел од делегациите на меѓународните настани и самити. Секој разговор на претседателот е однапред планиран.

Така, од пред десет дена е планиран ручекот на Трамп со новиот француски претседател Емануел Макрон. Според претставник на Белата куќа Макрон и Трамп ќе имаат “долг ручек”. Долго се шпекулираше дека Трамп посакувал во Елизејската палата да влезе екстремната десничарка Марин Ле Пен.

Но, според истиот претставник на американската администрација “Трамп бил импресиониран од убавата победа на Макрон”. Тој додава дека двајцата претседателите не делат секогаш ист став за работите но нема сомнение дека ќе најдат заеднички јазик особено за најзначајните теми на кои ќе разговаат како тероризмот и економијата.

И додека белгиските безбедносни служби се под стрес поради посетата на Трамп но и другите шефови на држави во текот на два, за нив многу долги, денови, на 24 и 25 мај во центарот на Брисел се организира протест под мотото “Трамп не е добредојден”. Слични акции ќе има и пред седиштето на НАТО во Брисел.