Брисел одлучи да ја измери загаденоста на улиците во градот. Институтот за животна средина на Брисел во текот на 4 години повика 276 волонтери кои ја мереа загаденоста на воздухот со ткнр “црн јаглен” (black carbon).
Овие волонтери во текот на 4 години носеа со себе мал апарат во сите нивни дневни активности низ Брисел.
Резултатите беа објавени вчера. Заклучокот е едноставен: возачите се најмногу изложени на овој “црн јаглен” чиишто честитчки влегуваат во дишниот систем, предизвикуваат кардио-васкуларни болести и малигни заболувања. Најизложени се возачите коишто во текот на долги минути се блокирани во сообраќајните гужви.
Истите високи мерки се регистрирани и во улиците на кои има високи згради и густ сообраќај. Во автомобилот нивото на загаденост е 5 пати поголемо отколку надвор а во автобусите на јавниот превоз 3 до 4 пати поголемо.
Автомобилистот кој чека во колона или вози бавно поради гужвата е изложен на издувните гасови на автомобилите околу него.
Според истражувањето, пешакот и велосипедистот се делумно потшедени од овие честички бидејќи се наоѓаат надвор каде што воздухот циркулира и полесно можат да избегаат од загадувањето.
Овој “црн јаглен” е производ на греењето и издувните гасови на автомобилите.
Според бриселскиот Институт, во друг европски град немало истражување од овој тип па тие не можат да кажат каква е состојбата во другите големи европски градови. Тешко е исто така да се определи точното влијание на здравјето без да се направи ново истражување фокусирано токму на здравствените последици.
Институтот подготви посебен сајт на кој се прикажани сообраќајниците и посебна веб алатка што ги покажува најмалку загадените улици.
Институтот се надева дека ова ќе стаса до ушите на политичарите за да се преземат мерки за намалување на загаденоста како алтернативни начини за движење низ градот но и промена на менталитетот. Брисел планира до 2025 година да ги забрани своите улици за автомобилите што најмногу загадуваат.