Британската полиција отпочна акција по наводите за подмитување во фудбалот, откако ги прегледа материјалите на „Дејли Телеграф“ што се однесуваат на корупциски сомнежи. Во соопштението што притоа го издаде порача дека Сем Алардајс „не е дел од нашата истрага“.
Биг Сем, како популарно го нарекуваат фудбалскиот менаџер, ја напушти функцијата селектор на Англија по објавата на снимка од „Дејли Телеграф“ во која нуди совети за заобиколување на правилата при трансфер на играчи. Алардајс го предводеше „Гордиот Албион“ во само еден натпревар пред раскинување на соработката во Фудбалската асоцијација (ФА).
Уверен дека немаат докази против него
„Бев уверен дека така ќе биде бидејќи немаат докази против мене. Од Фудбалската асоцијација барам да се позабави со овој случај што поскоро. Иако сум тажен со прераното завршување на мојот мандат, сепак, сум и горд што бев одбран да ја водам репрезентацијата на Англија. Се надевам дека ваквата потврда од полицијата ќе ми овоможи да продолжам натаму“, беше реакцијата на Алардајс што ја пренесе „Би-Би-Си“.
Алардајс беше на клупата на Англија само 67 дена по што на негово место беше назначен Герет Саутгејт како в.д. селектор. Замина по тајно направените снимки на весникот „Дејли Телеграф“ во кои тој разговара со новинари што се преправени во бизнисмени од Далечниот исток како да се „заобиколат“ правила за трансфер на фудбалери во сопственост на трета страна. Подоцна за „Скај Спортс“ се правдаше дека го сторил тоа за да му направи услуга на неговиот пријател и агент Скот Мекгарви бидејќи се надевал дека ќе помогне да успее да заврши работа.
Телеграф потоа објави дека истрагата се шири на уште осум „поранешни и сегашни менаџери“ во Премиерлигата што се вмешани во корупција без притоа да бидат наведени имиња.