Британскиот крал Чарлс Трети денеска предупреди за „заканата“ што ја претставува руската инвазија врз Украина за безбедноста на Европа и „демократските вредности“.
Во говорот пред германските парламентарци, тој ја подвлече значајната улога што Велика Британија и Германија ја одиграа во поддршката на Киев, особено на воениот фронт.
„Одлуката на Германија да испрати голема воена помош за Украина е храбра, важна и добредојдена“, рече тој.
Британскиот крал, првиот монарх кој зборуваше во Бундестагот, беше пречекан со долг аплауз.
Во говорот одржан главно на германски јазик, Чарлс Трети повика на единство околу Украина и климатските промени.
Британскиот крал Чарлс Трети вчера пристигна во посета на Германија, што е негова прва посета во странство откако дојде на тронот. Тој првично требаше да ја посети Франција, а потоа и Германија, но посетата на Франција беше одложена поради протестите во земјата.
Британскиот крал и кралицата сопруга Камила, кои беа пречекани со воени почести на Бранденбуршката порта, ќе престојуваат во Германија и утре.