Српската премиерка Ана Брнабиќ денеска во Драч го поканила македонскиот премиер Заев да ја посети Србија во ноември годинава.
„Неговата посета ќе ја искористиме за договор за заедничка седница на двете влади“, истакна Брнабиќ.
На денената средба во Драч, на Самитот на премиери од Западен Балкан, Заев на својата колека Брнабиќ и соопштил дека Македонија ќе биде воздржана доколку дојде до гласање за членство на Косово во УНЕСКО.
Брнабиќ објасни дека македонскиот колега и го потврдил она што и го ветил на самитот во јули на западнобалканската шесторка во Трст.
„Македонија ќе остане на иста линија, односно ќе биде неутрална ако се гласа за влез на Косово во УНЕСКО“, изјави Брнабиќ, пренесе РТС.
Брнабиќ вели дека било констратирано дека на Македонија и е многу важно пријателството со Србија и дека тоа ќе биде „јасен сигнал за посилно пријателство и силни врски со Србија, така да очекувам дека тоа прашање нема да се отвора“.
Хан: Проблемот меѓу Македонија и Србија се реши без посредство на ЕУ
На денешната прес конференција во Драч, еврокомесарот за соседска политика и проширување на ЕУ Јоханес Хан, изјави дека дипломатскиот проблем меѓу Македонија и Србија се појави и беше решен така брзо што немаше потреба од вклучување на Европската унија.
„Секако дека би сакал да се запознаам подобро со причините за овој проблем, но добро е што веќе постои доверлива врска меѓу лидерите на двете земји и тоа што остварија брз телефонски разговор“, рече Хан.
Тој го посочи како позитивен, начинот на кој беше решен проблемот што покажува дека постои позитивен развој во регионот и се надева дека ќе продолжи и во иднина.
„Првиот разговор меѓу двајцата лидери покажува дека постои самодоверба кај политичарите за надминување на овие прашања и моето очекување е дека ваквите работи се настани од минатото“, додаде Хан.