Заев во целата своја политичка кариера никогаш не се штедеше, не се штедеше ни како опозиционер кога почна да ги отвора прислушуваните разговори т.н. бомби кои доведоа до промена на власта. Не се штедеше ни да влезе во сериозни политички разговори и по 25 години да изнајде решение за спорот што го имавме со Грција.
Ова вечерва го посочи поранешниот премиер и претседател на СДСМ, Владо Бучковски, во дебатниот магазин „Click Plus“ на ТВ21.
Тој рече и дека оставката на премиерот Зоран Заев, во вакви околности, не била потребна.
– Оставката за изгубените локални избори не беше потребна, додаде Бучковски.
Тој изјави дека не било прв пат Заев на овој начин да реагира, изневерен од она што меѓународната заедница требало да го испорача.
Во врска со тоа каде згреши Заев , Бучковски анализираше:
– Мислам дека сега кога завршија изборите, „по изгубените битки сите се прават генерали“, но дел од стратегијата на СДСМ која е градена пред да дојде до меѓусебно договарање или од страна на Заев, како што многупати спомена, заради убавината на демократијата, слободата за којашто тој придонел да биде во Македонија, дозволи коалиционите партнери, затоа што се локални избори каде што треба да дојде до израз квалитетот на понудените кандидати и програми кои тие ги нудат, да дозволи ЛДП/ДОМ да настапат сами на овие избори. Се покажа дека тоа беше погрешна проценка, нагласи Бучковски во дебатниот магазин „Click Plus“ на ТВ21.