Бугарија се најде пред сопствен ѕид на плачот, но и пред светски столб на срамот. Пред првиот ја доведоа фудбалските репрезентативци кои на стадионот „Васил Левски“ во Софија загубија од Англија со 0:6 во квалификациите за Европското првенство во 2020 година, пред вториот ја доведоа група навивачи кои за дел од избраниците на селекторот Герет Саутгејт упатуваа извици што имплицираат расистички навреди, а пред ТВ камерите и фотообјективите се претставија и со нацистички поздрав од својот „богат“ репертоар. Педагошки да влијае кај нив се обиде голманот Илиев Иванов и дел од соиграчите додека бугарскиот селектор Красимир Балаков по мечот рече „не слушнав ништо навредливо од трибините“.
Зад источниот сосед е ден на турбуленции, нервози, одлуки, критики и реакции од домашни и странски фактори и медиуми. Се огласи и Европската фудбалска асоцијација (УЕФА) која од Владите побара да ја засилат „борбата против расистите“ што ќе значи полесно справување со појавата и на стадионите. Од централата во Нион и најава за строги казни во иднина за испадите од таков тип.
Почетокот на работниот ден му преседна најпрво на премиерот Бојко Борисов кој ставен во тесно и со вперен прст од меѓународната заедница, веднаш побара оставка од првиот човек на Бугарскиот фудбалски сојуз, Борислав Михајлов. Тој, пак, прво одби да се повлече од функцијата за потоа, сепак, да го прифати апелот од првиот човек во Владата.
По гостувањето на Ангија во Софија се јави и британскиот премиер, Борис Џонсон кој побара остри санкции за Бугарија. Саутгејт пред мечот предупреди на можни расистички испади од трибините, што подолг период е случај на стадионите источно од нас, за што доби поддршка и во британските медиуми додека за бугарските беше претерано драматизирање на ситуацијата.
Стадионот „Васил Левски“ и онака беше делумно затворен за мечот со Англија. Бугарската федерација беше казнета за расистичкото однесување на нејзините навивачи и во дуелите со Косово и со Чешка во групата А од тековниот циклус, а сега се наоѓа и пред сериозна санцкија доколку Дисциплинската комисија при УЕФА заклучи трет прекршок во квалификациите што е, секако, за очекување. Една од опциите што „висат“ над бугарскиот фудбал е исклучување на националниот тим од натамошните квалификации.
Поради расистичките испади и нацистичките поздравувања, натпреварот во два наврата беше во прекин во првото полувреме. Англиските фудбалери и стручен штаб, ако сакаа, можеа комотно да се повлечат во соблекувалните и против таквата нивна одлука ќе немаше забелешка од никого. Но, решија да останат во мечот и до врв да ја наполнат бугарската мрежа.