Градоначалникот на Солун, Јанис Бутарис се соочува со жесток напад во неговата држава откако рече дека неговиот град треба да размисли да го преименува аеродромот во градот кој во моментов се вика „Македонија“.
Како што пренесува „Екатимерини“, за време на состанок на градскиот совет во Солун, Бутарис дал сугестија дека треба да се размисли да се промени и името на автобуската станица во Солун.
„Не реков дека треба да ги промениме имињата, само го поставив прашањето“, изјави Бутарис за Скај ТВ, дополнувајќи дека името Македонија само ги дели луѓето.
Неговиот предлог за аеродромот бил да се преименува во Никос Галис, познатиот грчки кошаркар кој влезе и во Куќата на славните во Америка.
Но, Јоргос Кумутсакос од Нова Демократија не мисли така.
„Тој треба да им ја остави дипломатијата и преговорите на дипломатите и да се сконцентрира на неговите обврски како што се здравјето и собирањето на сметот во неговиот град“, изјавил Кумутсакос.
Никос Галис е неколкукратен шампион во кошарка во грчката лига и во европските лиги. Беше драфтуван во најсилната кошаркарска лига НБА од страна на Бостон Селтикс, но поради повреда никогаш не заигра во лигата.
Подоцна повторно беше побаран од Селтикс но тој ги одби.
Легендата на Бостон, Ред Оербах, еднаш рече дека најголемата негова грешка што се однесува до кошарката е што не го задржал Галис во Селтикс и покрај повредата со која се соочуваше.