Со пароли „нема плата нема мир“, „кај се парите“, „докторе кога е мојот термин“, „подмирете ги вашиот долг – следи исклучување“, „весниците не ги даваме“, новинарите од весниците на МПМ, „Утрински“, „Дневник“ и „Вест“ го започнаа симболичниот марш, од редакциите до Паркот на новинарите кој се наоѓа спроти старата зграда на Нова Македонија.
Новинарите од менаџментот ги бараат неисплатените плати и информација за тоа што во иднина ќе се случува со овие медиумите.
Претседателката на Самостојниот синдикат на новинари и медиумски работници, Тамара Чаусидис вели дека штрајкот ќе продолжи се додека не се исплатат вработените и не им се даде информацијата за тоа што понатаму ќе се случува во весниците. Чаусидис вели дека ќе продолжат да штрајкуваат се додека не се исполнат нивните барања и да не се надеваат дека ќе ги добијат на кондиција, затоа што новинарите се научени да штрајкуваат и протестираат.
„Штрајкот се одвива со исто темпо како и минатите денови , со тоа што ескалира во делот на демонстрирање на незадоволството. Факт е дека веќе седум дена штрајкуваме и немаме никаква информација од менаџментот. Срамно е што со новинари истражувачи мора да дознаваме кој е сопственик и кој е управител. Нешто се случува, има промени на сопствеништвото – на менаџерите но никој не најде засходно да им каже на луѓето кога ќе им бидат исплатени платите и што ќе се случува со редакциите на „Медиа Принт Македонија“. Морам да кажам дека според нашите сознанија во МПМ работеа 288 луѓе. Дел од нив си заминаа, но збориме но останаа околу 250. Тоа се 250 семејства или околу 700 луѓе кои се засегнати од иднината на оваа некогаш успешна фирма. Срамота е да се напушти сопствеништво, управителство, а да не се најдете засходно на луѓето за кои бевте одговорни, да им кажете што планирате и што е иднината на фирмата. Барем до толку новинарите и медиумските работници заслужуваат. Покрај досегашната поддршка од Европската федерација на новинари, ЗНМ од прогресивните синдикати, денеска добивме поддршка и од регионот. Синдикатите на Србија, Црна Гора и Хрватска, кои го препознаваат нашиот проблем и се солидаризираат. Имаме стратегија за тоа што ќе се случува понатаму ако не се исполнат наште барања и ќе бидете информирани. Имаме и стратегија за продолжување на штрајкот, но и за прогласување победа“, рече Чаусидис.
Денешниот штрајк на новинарите беше седми по ред. И покрај штрајкот, новинарите продолжуваат да ги изработуваат весниците, бидејќи сметаат дека тоа им го должат на читателите.