МВР не открива дали со измените во Уредбата за обезбедување, телохранители од МВР повторно ќе имаат екс министерката Гордана Јанкулоска и поранешниот шеф на тајната полиција Сашо Мијалков, но попладнево оттаму испратија соопштение за да објаснат зошто се направени измени.
Според образложението на МВР, причината е тоа што изминативе години Македонија се соочувала со бројни сериозни закани по безбедноста и територијалниот суверенитет и интегритет.
МВР ги наведува сите поголеми акции кои беа реализирани како што се: „Планинска бура“, „Диво Насеље“, откривањето и лишувањето од слобода на одговорните за грабежот на Прокредит Банка, операцијата „Пепел“, „Чекан“, случаите „Босфор“, „Дирегент“, „Детонатор“, „Којот“, „Ќелија“ и други.
„Сите кои учествувале во планирањето, организирањето, координирањето и реализирањето на сите овие случаи се под одреден безбедносен ризик што го дефинираат службите. Нам не ни требаат дополнителни ризици и инциденти. Мора да делуваме превентивно и да не дозволиме нешто да се случи, за потоа да водиме истраги и да анализираме каде е направен пропустот.“, пишува во соопштението на МВР.
Како што вчера обелодени НОВА, Владата на седницата на 23 август ја измени „Уредбата за личности и објекти што се обезбедуваат“, во делот на временскиот период за кој што може да добијат обезбедување од Шестата управа на МВР.
Досега според оваа Уредба, членови на Владата, Претседателот на Собранието и други функционери, имаа право на обезбедување најдолго „до една година“ по престанувањето на функцијата. Со најновата измена, која денеска е објавена во Службен весник, поранешни функционери ќе добијат право на лично обезбедување „за времетраење на опасноста“.
Гордана Јанкулоска и Сашо Мијалков поднесоа оставки од функцијата на 12 мај 2015 година и имаа законско право да добијат обезбедување од МВР најмногу една година по престанокот на мандатот. Со законските измени, тие повторно добиваат можност да ги чуваат телохранители од МВР.
Со реакција денеска се јави и СДСМ, обвинувајќи го министерот Митко Чавков, дека од МВР прави агенција за обезбедување поранешни функционери.
„ Нам и на целата македонска јавност ни е јасно дека по долги години криминално владеење следува период на страв од сопствениот народ. Јасно ни е дека поранешниот премиер Никола Груевски и неговите блиските поранешни функционери се плашат да излезат на улица меѓу луѓе без бодигарди поради гневот на ограбените граѓани. Грев е и перверзија, некој што само за очила за сонце има 60.000 евра, да дозволи осиромашениот народ да му ги плаќа стравовите“, велат од СДСМ.
Од опозициската партија бараат Чавков да и објасни на јавноста кои се критериуми за оценка на степен на опасност по „физичкиот интегритет“ на Груевски и бившите функционери.
Од МВР не обелоденија кои поранешни функционери ќе имаат телохранители на државна сметка, но акциите кои ги потенцираат како ризични по безбедноста, сите се реализирани во време кога на чело на Министерството беа двоецот Јанкулоска – Мијалков. Потоа екс директорот на Бирото за јавна безбедност Љупчо Тодоровски, како и командантот на Алфите Ивица Анчевски-Пуки.
Но, затоа во соопштението од министерството на Чавков наведоа дека „без разлика на кусиот мандат и техничкиот министер г-дин Оливер Спасовски ја користи оваа Уредба и има побарано и добиено двајца полициски службеници и две возила како обезбедување од Министерството за внатрешни работи“.