Александар Чеферин вчера беше во неколкучасовна посета на Скопје. Шест месеци по Суперкупот, првиот човек на УЕФА овојпат ја удостои Фудбалската федерација на Македонија (ФФМ) на отворањето на сместувачкиот капацитет при тренинг центарот „Петар Милошевски“. Словенечкиот правник беше во придружба на легендата на холандскиот, европски и светски фудбал, Марко ван Бастен, кој е технички директор на УЕФА, потоа на Зоран Лаковиќ, директор на одделот за национални асоцијации при УЕФА и на Бјорн Васало, директор на национални селекции во УЕФА.
„Македонија ја збогатува базата за прогрес на фудбалери, Македонија бележи напредок во бројот на терени, Македонија ја развива фудбалската инфраструктура, Македонија исчекори напред со учеството на младата репрезентација на Европското првенство во 2017 година, а Македонија е, конечно, во одлична позиција да избори учество и на сениорското Европско првенство во со 2020 година преку Лигата на нации. Алиби повеќе нема. Му кажав тоа и на Илчо Ѓорѓиоски. УЕФА останува партнер на Македонија“, истакна Чеферин пред присутните за време на денешната свеченост во ФФМ.
Сместувачкиот капацитет во рамки на комплексот „Куќа на фудбалот“ е наменет за учениците од ФФМ/УЕФА елитната Академија, но и за младите национални тимови. Опфаќа 30 двокреветни соби што се целосно опремени за живеење, апартмани за селекторите и нивните соработници, како и заеднички простории – сала за состаноци, училници и заедничка кујна и трпезарија. Содржините по потреба ќе бидат на располагање и на младинските селекции во пресрет на натпреварите.
Посетата на високиот гостин од Нион и пуштањето во употреба на сместувачкиот капацитет во ФФМ со свое присуство го збогатија и дел од поранешните македонски репрезентативци Николче Новески, Јане Николоски, Арѓент Беќири, Срѓан Захариевски, Александар Васоски, дел од фудбалските легенди како Вујадин Станојковиќ, Благој Истатов, Кочо Димитровски, Ѓоре Јовановски, градоначалникот на Скопје, Петре Шилегов, потпретседателот на Владата, Кочо Анѓушев, директорот на Агенцијата за млади и спорт, Дарко Каевски, советникот за спорт во македонската Влада, Даниел Димевски, итн.