Македонската ракометна репрезентација во иднина продолжува без Лино Червар. Разделбата со трофејниот тренер се официјализира вечерва по дописот што Ракометната федерација на Македонија (РФМ) го објави на својата интернет страница. Хрватот со писмо го известил Живко Мукаетов, прв човек на РФМ, дека донел одлука за враќање во својата родна земја. Притоа изразил благодарност за соработката и третманот што го имал во, како што навел, неговата втора татковина.
„Дали тоа да биде со репрезентацијата на државата во која сум роден, во која основав семејно гнездо, во која се изградив, развива и афирмирав како ракометен тренер и ги постигнав најголемите светски успеси и во која кога-тогаш мора да се вратам и вечно да останам. Или да се одредам за репрезентација на една мала, горда држава, мојата втора татковина која ме дочека и прифати како свој тренер и на кој му даде се што може да се даде? – Сепак ја одбрав Хрватска, мојот роден крај, мојата земја“ стои во дописот на Червар до Мукаетов.
Од Ракометната федерација на Македонија нагласуваат дека со предметниот допис автоматски се активира и правниот инструмент за едностран раскин на договорот со Лино Червар. Најавено е мобилизирање на своите ресурси во наредниот период и формирање на тело за селекција на потенцијални кандидати за пополнување на испразнетото место на кормилото. Се со цел за пто поскоро надминување на несаканата ситуација што доаѓа во тек на подготовки за квалификациски натпревари.
„Ракометната федерација ќе вложи максимални напори со цел за задржување на континуитетот на настапи на сениорите на големите натпреварувања и во боите на националниот дрес заеднички да одиме во нови походи“, се вели во веста на РФМ по завршената соработка со Лино Червар.