Украина е Украина, Чешка е Чешка, а Кире Лазаров е Кире Лазаров. И не може сам со уште еден зад себе против сите. Капитенот, со поддршка од Манасков, ја држеше Македонија во триумфот во премиерниот меч во квалификациите за ЕП 2018 во Скопе, но не можеше и попладево во Плзен. Чешка ги дочека своите пет минути и со 35:28 го разби нашиот национален тим во второто коло. Хрстка со 10 гола од 10 удари беше најефикасен на средбата, по шест дадоа Бечвар и Петровски. Лазаров повторно беше прв стрелец во составот на Лино Червар со 9 погодоци, овојпат еден повеќе од Манасков. Затаија голманите Ристовски и Даскаловски кои одбранија вкупно шест удари, по три двајцата.
Она што се стави под тепих под триумфот со Украинците, излезе на површина против Чесите. Резултатот во средата понесе, во втор план падна играта што денеска, сепак, дојде до израз. Ако во најголем дел од воведниот меч Македонија беше во предност, во Плзен не беше ниту еднаш. Се држеше чекор до 3:3 по што бродот почна да се движи по надолна линија. Противничкиот гол беше невидлив десетина минути за македонските ракометари по кои Чесите направија серија од 7:0 и заминаа на 10:3. Првиот нареден го реализира Кире Лазаров од пенал по што беше јасно во кој правец е тргнат натпреварот. До крајот на првите 30 минути се играше гол за гол и на одмор се замина со 18:12.
Домашната селекција не остави ништо на случајот и по враќање на теренот. Иако Македонија почна поагресивно во одбраната и во еден момент намали на три негатива, сепак, пукнатини беа присутни што Хрстка, Бечвар и Петровски немилосрдно и ги користеа. Чесите набрзина почнаа повторно да таложат залиха што постепено растеше (22:17, 26:19, 28:20). Меѓу стативите како да не беше голманскиот двоец, во нападот отсутни Георгиевски и Прибак и Стоилов. И ако треба и може да се извлечат позитивни моменти во лошиот настап и убедливиот пораз, покрај Кире Лазаров и Дејан Манасков, тоа се Нелоски и Талески кои, барем реализаторски, одиграа во континуитет како и против Украинците.
Квалификациите за Македонија продолжуваат во мај со двомеч против Исланд. Во меѓувреме националниот го очекуваат подготовки и настап на Светското првенство во Франција во јануари во 2017 година.
Чешка – Македонија 35:28 (18:12)
Спортска сала „Локомотива“ во Плзен. Гледачи: 2.000. Судии: Оскар Лопез и Анхел Рамирез од Шпанија.
Чешка: Мрква, Галија, Хрстка 10, Бечвар 6, Јурка 4, Собол /, Јурак /, Котрц 1, Стехлик /, Бабак 2, Линхарт 3, Петровски 6, Здрахала /, Узек 2, Ланда /, Риха /. Селектор: Јан Филип/Даниел Кубеш.
Седмерци: 3/3. Исклучувања: 8 минути.
Македонија: Ристовски (3 одбрани), Даскаловски (3 одбрани), Манасков 8, Стоилов 1, К. Лазаров 9, Митков /, Јоновски /, Талески 4, В. Маркоски /, Н. Маркоски 1, Прибак 1, Георгиевски 1, Ф. Лазаров /, Ојлески /, Кузмановски /, Нелоски 4. Селектор: Лино Червар
Седмерци: 5/7. Исклучувања: 8 минути.