Четири спортски федерации потпишаа договори со Агенцијата за млади и спорт (АМС) за добивање на наменски донации од фондот што e утврден во Законот за игри на среќа и за забавни игри. Најголем дел од средствата (5,2 милиони денари) ќе бидат насочени кон Ракометната федерација на Македонија (РФМ), по четири ќе ползуваат Фудбалската федерација на Македонија (ФФМ) и Македонската кошаркарска федерација (МКФ) и со 1,5 милиони денари ќе располага Карате федерацијата на Македонија.
„Склучените договори со Фудбалската, Кошаркарската, Ракометната и Карате федерацијата се однесуваат на поддршка на нивните настапи на меѓународната сцена, но и организација на меѓународни натпреварувања чиј домаќин е Република Македонија. Со ова сме убедени дека ќе придонесеме за подобрување на работата на спортските федерации, за подобрување на резултатите на националните селекции и за подигнување на квалитетот на спортскиот систем во нашата земја. Новите дополнителни приходи за федерациите треба да бидат мотив за нивно максимално ангажирање во спортот и создавање на функционален и ефикасен систем“, рече Марјан Спасески, директор на АМС.
Тој притоа потенцира дека со измените и дополнувањата на Законот за игри на среќа и забавни игри е овозможен нов стабилен извор на финансирање на спортските федерации. По овој основ, според Спасески, досега се издвоени 52,5 милиона денари за 42 национални спортски федерации.