Четворица од шесте членови на екипажот загинаа откако американски воен авион за полнење гориво се урна во западен Ирак, соопшти Централната команда на САД (CENTCOM), пренесува NBC News.
Несреќата се случила во четврток за време на операции поврзани со војната меѓу Иран и САД. Според соопштението на американската војска, станува збор за авион KC-135 Stratotanker, кој се користи за полнење гориво во воздух на борбени авиони.
CENTCOM соопшти дека авионот се урнал околу 14 часот по источнoамериканско време во западниот дел на Ирак.
„Околностите на инцидентот се предмет на истрага. Сепак, загубата на авионот не е резултат на непријателски оган ниту на пријателски оган“, соопшти CENTCOM.
Во соопштението се наведува дека два авиони биле вклучени во инцидентот, при што едниот безбедно слетал. За останатите двајца членови на екипажот не се дадени детали, а спасувачките операции продолжуваат.
Идентитетот на загинатите војници засега не е објавен, што е вообичаена процедура во американската војска додека нивните семејства не бидат официјално известени.
Според американските власти, оваа несреќа го зголемува бројот на загинати американски војници на десет лица од почетокот на операцијата „Epic Fury“, која започна на 28 февруари, кога САД и Израел започнаа воени напади врз цели во Иран.
Минатата недела, пак, Кувајт по грешка собори три американски борбени авиони, но во тој инцидент немало загинати.