Сериозни здравствени проблеми на човекот кој важеше за претплатен на титули во фудбалската игра. Сер Алекс Фергусон во текот на денот бил хоспитализиран во Лондон во тешка состојба, а вечерва бил подложен и на хируршки зафат поради крварење во мозокот. Лекарската борба за животот на 76 годишниот Шкотланѓанец, кој ја заврши кариерата во 2013 година, минала успешно, пишуваат англиските медиуми.
„Зафатот мина добро, но неопходен е период на интензивна нега за сер Алекс Фергусон за целосно опоравување“, соопштуваат од болницата.
Веста дека операцијата минала добро и состојбата на Фергусон е стабилна ја потврдија и од Манчестер јунајтед, клуб на чие кормило беше Шкотланѓанецот цели 26 години и во тој период го предводеше клубот од „Олд трафорд“ до 13 титули во Премиерлигата, пет во англискиот ФА куп, два во Лигата на шампиони на УЕФА и еден куп други трофеи во разни натпреварувања.
„Скај спорт“ во текот на денот објави информација дека Фергусон е во тешка здравствена состојба и за вечерва ја најави операцијата. „Телеграф“, пак, дошол до сознание оти трофејниот шкотски менаџер бил примен во болница уште утрото. Потврда дека ситуацијата е сериозна, тешка, па и критична, дојде и попладнето кога неговиот син Дарен го пропушти дуелот на Донкастер против Виган во англискиот чемпионшип од „приватни причини“.