Според српскиот министер за надворешни работи, Ивица Дачиќ, навредливо е тоа што се користи терминот „Република Косово“ а не кратенката ПЈРМ.
Откако Скопје побара од српските власти да не ја користат референцата „Поранешна Југословенска Република Македонија“, Дачиќ одговорил дека Белград не смета оти тоа е навредливо, туку дека за нив навредливо е користењето на терминот „Република Косово“.
Барањето од македонските власти дојде во петокот, откако на сметките за патарините низ Србија се користи кратенката ПЈРМ.
„Ние само бараме обострано коректен однос. Доколку веќе протестираат против сметките на патарините, што би требало ние да правиме поради нивното признавање на Косово и гласањето во УНЕСКО“, одговорил Дачиќ пред српските медиуми.
Српскиот министер исто така запрашал зошто Македонија не ги напушти ОН, Советот на Европа, ОБСЕ и состаноците во ЕУ, доколку смета дека за нив ПЈРМ е навредливо име.
„Зошто седат под тоа име, а сега им е проблем сметката за патарина на која го пишува тоа? Србија не го промени ставот за признавањето на Македонија, но и за Србија е навредливо и срамно кога тие ќе речат „Република Косово“, изјавил тој.