Првата тет-а-тет средба на Русинот Владимир Путин и Американецот Доналд Трамп, на маргините на самитот Г20 во Хамбург, траеше повеќе од два часа. Поточно 2 часа и 15 минути. Новинарите на самитот предвидуваа дека двајцата лидери нема да се задржат повеќе од половина час и се излажаа.
Двете делегации одлучија повеќе за средбата да кажат во текот на вечерта. На излегување од средбата, Путин кратко ги извести новинарите дека тие разговарале за Сирија, борбата против тероризмот и сајбер-безбедноста.
Според Рекс Тилерсон, помеѓу двајцата лидери имало “позитивна алхемија”.
“Разговорот беше многу конструктивен, врската помеѓу двајцата лидери веднаш се воспостави”, изјави Тилерсон.
Средбата почна со размена на љубезни зборови.
“Чест ми е да се сретнам со вас”, рече Трамп.
“Воодушевен сум што ве среќавам и се надевам дека оваа средба ќе донесе позитивен резултат”, одговори Путин.
“Сме зборувале на телефон, но телефонските разговори никогаш не се доволни”, додаде тој.
На ова Трамп рече дека тие телефонски разговори биле “многу, многу добри”.
Кога Трамп дојде во Белата куќа, тој имаше само позитивни изјави за Путин и најавуваше дека двете земји ќе им стават крај на тензиите и дека тоа, според Трамп – “ќе биде прекрасно”.
Но оттогаш односите заладија. Стасаа прво сомнежите за руското мешање во американската претседателска кампања, па американските санкции против Русија поради украинската криза, руската поддршка за сирискиот режим која воопшто не им се допадна на САД… Згора на тоа, Доналд Трамп вчера во Варшава ја критикуваше Русија за која рече дека игра “дестабилизирачка” улога.
Пред средбата САД изјавија дека во однос на Сирија се подготвени “да ги бараат можностите за воспоставување заеднички механизми со Русија”, како зони на забрана на летање, за да се стабилизира Сирија.