Откако министерот за здравство, Беким Сали, попладнево преку објава на Фејсбук ги покани професорите Драган Даниловски, Никола Пановски и Вело Марковски да членуваат во новата Комисија за заштита на населенито од заразни болести, или, да бидат дел од неговиот тим на советници, тие не ја прифатија поканата.
Проф.д-р Никола Пановски, кој неодамна изјави дека сега, по речиси две години, не би сакал да биде член на Комисијата за заштита на населението од заразни болести, вечерва ни изјави:
– Јас на Фејсбук ли треба да му одговорам? Совети на сите им давам, секако и на министерот ако побара, не мора официјално функција да имам.
Проф.д-р Драган Даниловски за НОВАТВ вечерва изјави „Ќе го повторам тоа што неодамна го изјавив во врска со членувањето во Комисијата за заразни болести, само што тука го додавам и тимот на советници“.
– Министерот ми нема врачено директна, лична покана. Поканата е упатена само преку социјалните мрежи. Како и да е, не прифаќам членување во Комисијата за заразни болести при Министерството за здравство ниту во тим на советници. Овој мој став се темели на свесноста дека ниту Комисијата за заразни болести ниту било каков тим на советници никогаш не може автономно да функционираат! Зошто? Затоа што таа претставува само советодавно тело на Министерот за здравство. Таа нема ингеренции да носи извршни одлуки, туку само заклучоци, кои му ги предлага на Министерот. Тој може, ама не мора, да ги прифати. Крајната одлука е само негова и би требало да биде извршна. Арно ама, ниту неговите одлуки во тек на пандемијава не се извршни. Треба да поминат на Кризен штаб при Владата – евентуално да се модифицираат (влијание на политика!) – и дури потоа формално да се прифатат од Владата – вели проф.д-р Даниловски.
Тој додава дека „тимот на советници би имал сосема ист статус и ингеренции како и комисијата“!
– Во таков амбиент, за мене е неприфатливо да ја жртвувам својата автономија. Останувам со автономен, независен статус како досега – член на универзитетската заедница – и продолжувам да функционирам волонтерски во врска со сѐ што значи стручна помош секому што ќе ми ја побара – на Министерот за здравство, но, пред сѐ, на граѓаните, нагласува проф.д-р Даниловски.
И проф.д-р Вело Марковски претходно вечерва за НОВАТВ изјави:
– Првпат слушам. Објави на Фејсбук не вреди да се коментираат, ни рече проф.д-р Марковски.
(Љ.Б.)