Даночните власти во Австралија и Нов Зеланд започнаа истрага на локалните клиенти на правната фирма со седиште во Панама што е во центарот на финансиската афера со која во јавноста излегоа податоци за евентуално даночно затајување.
Податоците се состојат од повеќе од 11,5 милиони документи од досиејата на адвокатска фирма Мосак Фонсека, со седиште во даночниот рај Панама кои откриваат детали за стотици илјади клиенти во повеќе земји.
Документите се во центарот на истражувањето објавено вчера од страна на Меѓународниот конзорциум на истражувачки новинари, германскиот весник Зидојче цајтунг и повеќе од 100 други новинарски организации од целиот свет. Зидојче цајтунг објави дека добил огромен број документи, а потоа ги споделил со други медиуми.
Објавените „Панама-документи“ опфаќаат период од речиси 40 години, од 1977 година па сè до минатиот декември, и наводно покажуваат дека некои друштва со седиште во даночните оази биле користени за перење пари, трговија со оружје и дрога, како и даночно затајување.
Британскиот весник Гардијан рече дека документите покажуваат дека мрежа од тајни офшор-договори и заеми во вредност од 2 милијарди долари води до блиските пријатели на рускиот претседател Владимир Путин.
Со истрагата на даночната служба на Австралија се опфатени повеќе од 800 од списокот на богатите клиенти на Мосак Фонсека.