Кошаркарската репрезентација на Македонија со победа ги почна претквалификациите за ЕП 2021. Вечерва во Попрад, „црвено-црните“ триумфираа над Словачка со 74:66 и ширум го расчистија патот кон главната натпреварувачка фаза за континенталниот турнир по четири години.
Како пресуден за конечниот исход се покажа вториот период. Избраниците на селекторот Јорданчо Давитков одиграа одлична одбрана, сопствениот кош го направија речиси невидлив за домашните, дозволија само осум поени, а постигнаа 21 како аванс за бодовите против незгодниот ривал. Голема улога притоа имаа Ричард Хендрикс кој го заврши мечот со дабл-дабл ефект (21 кош, 14 скока) и капитенот Војдан Стојановски кој беше стрелец на 20.
„Не отстапивме од договорот како да одиграме. Бевме одлични во одбраната и успеавме да го изолираме Кјурик. Се случи мал пад на концентрацијата во последниот период, Словаците погодија неколку нелогични тројки, но и покрај тоа ја задржавме контролата и не дозволивме да паднеме. Задоволен сум и од играта и, секако, од победата. Ја заслуживме според прикажаното“, изјави Давитков по средбата.
Македонија веќе во недела ја очекува и дуел на домашен терен против Швајцарија во претквалификациската група Б. Потоа ќе следува тримесечна пауза во циклусот до реваншот со Словаците (25 февруари) и со Швајцарците (28 јуни).