Селекциите на Србија, на Франција, на Италија и на Австралија имаат водство од 2:0 по првиот натпреварувачки ден во мечевите од првото коло во новата сезона во Дејвис купот – Светска група.
Французите ги добија двата воведни сингл дуелa против Јапонија во „Арлејк Колосеум“ во Токио. Ришар Гаске со 6:2, 6:3, 6:2 го совлада Таро Даниел додека Жил Симон, исто така, во три сета (6:3, 6:3, 6:4) беше подобар од Јошихито Нишиока.
Идентична предност на гости имаат и Италијанците на кои во Буенос Аирес им недостасува уште еден триумф за елиминација на Аргентина која без Хуан Мартин дел Потро ја брани титулата освоена во Загреб лани. Во денешните дуели, Паоло Лоренци беше убедлив со Гвидо Пелја на трипати по 6:3, Андреа Сепи славеше против Карлос Берлок со 6:1, 6:2, 1:6, 7:6.
Австралија во Мелбурн не дозволи изненадување на отворањето на натпреварот со Чешка. Џордан Томпсон го победи Јири Весели со 6:3, 6:3, 6:4, а Ник Кирјос ја оправда фаворитската улога против Јан Сатрал (6:2, 6.3, 6:2).
И Србија е на чакор до четврт-финале по денепните 2:0 против Русија во Ниш. Првиот поен за Србите го освои Виктор Троицки против Карен Качанов (6:4, 6:7, 6:3, 1:6, 7:6), а вториот го впиша Новак Ѓоковиќ. При резултат 3:6, 6:4, 6:1, 1:0 неговиот противник Данил Медведев го предаде мечот.
Дејвис куп – Светска група/1 коло
Прв натпреварувачки ден
Буенос Аирес (земјена подлога): Аргентина – Италија 0:2
Токио (тврда подлога): Јапонија – Франција 0:2
Мелбурн (тврда подлога): Австралија – Чешка 2:0
Ниш (тврда подлога): Србија – Русија 2:0
Осиек (тврда подлога): Хрватска – Шпанија 1:1
Франкфурт (тврда подлога): Германија – Белгија 1:1
Бирмингам, Алабама (тврда подлога): САД – Швајцарија (ноќеска)
Отава (тврда подлога): Канада – В. Британија (ноќеска)