Светот добива и тениски мундијал по теркот на останатите екипни спортови. Годишното Собрание на Интернационалната Тениска Федерација (ИТФ) се изјасни позитивно по предложените измени на форматот на Дејвис купот. Две третини од делегатите гласаа „за“ новиот проект што ќе стартува од 2019 година, откако пред нив беше претставен бизнис план „тежок“ три милијарди долари за период од две и пол децении. Како партнер притоа се јавува кинеската групација „Космос“ зад која стои стоперот на Барселона, Жерар Пике.
Наместо досегашното натпреварување што траеше низ цела година, од наредната се воведува седумдневен финален турнир со 18 репрезентации. Квалификациите ќе се играат во февруари и во нив ќе учествуваат 24 национални тима од кои ќе бидат формирани 12 двојки. Победниците заедно со полуфиналистите од 2018 година и две поразени селекции со вајлд карта ќе разигруваат за трофејот на премиерното издание од 18 до 24 ноември во Мадрид или во Лил.