Од Делегацијата на Европската Унија во Скопје денеска за ТВ21 истакнаа дека немаат никакво писмо во врска со поранешната градоначалничка Теута Арифи.
„ЕУ не доби никакво официјално договорно писмо за смена на актуелниот шеф на мисијата од Владата на Северна Македонија“, изјавиле од Делегацијата на ЕУ во Скопје за ТВ21.
Во јавноста претходниве неколку денови се појавија информации дека Теута Арифи ќе биде именувана за амбасадор.
Министерот за надворешни работи на Република Македонија, Бујар Османи, денеска ги демантираше медиумските написи дека поранешната градоначалничка на општина Тетово, Теута Арифи била предложена за амбасадор во ЕУ.
– Никогаш немало барање, пратено агреман ниту имало предлог за поранешната градоначалничка на Тетово Теута Арифи да биде амбасадор на Македонија во Анкара и Вашингтон. Имало размислување за Брисел, но немало формализиран предлог, изјави министерот Османи денеска на прес-конференција.
Но неговиот партиски шеф, Али Ахмети, уште во март годинава потврдил дека токму Теута Арифи е предложена за амбасадор во Брисел.
– Г-ѓата Арифи беше вицепремиер за евроинтеграции и го познава овој процес. Оценето е дека Арифи може да придинесе по однос на оваа точка, а причина за тоа се нејзините придонеси и претходните врски кои ги имала со регионот, а и со ЕУ, изјави Ахмети на 31 март годинава.