На состанокот на Комисијата за заразни болести што треба да се одржи оваа недела ќе се разговара за евентуални препораки во однос на критериумите за влез во Македонија, но засега нема најава за рестриктивни мерки на границите.
Здравствените експерти во моментот чекаат да излезат публикации со информациите кои им требаат во врска со тежината на клиничката слика, односно да се види односот на делта сојот кај луѓе кои се или не се вакцинирани.
Министерот за здравство Филипче смета дека треба да се препорачаат мерки кои ќе бидат ефикасни, но во моментот оцени дека ситуацијата е мирна и нема голем број на прегледи по болниците за суспектни пациенти на ковид-19.
Согласно вчера објавените податоци од Институтот за јавно здравје, од направени 2.518 тестирања беа регистрирани 19 нови случаи на ковид-19, а со тоа бројот на активни случаи засега е 156. Најголемиот број од новите случаи се регистрирани во Тетово – 11 и во Скопје – осум. Во претходното деноноќие не беа регистрирани смртни случаи.
Вкупниот број ковид-дијагностицирани лица во земјава од почетокот на епидемијата изнесува 155.760, бројот на оздравени пациенти е 150.118, на починати е 5.486.
Во однос на вакцинацијата на децата против ковид-19, Филипче вчера истакна дека нема да биде задолжителна. Завчера тој изјави дека ќе се дозволи вакцинирање на деца од 12 до 16 години со вакцината на „Фајзер“, што во овој момент е единствена вакцина која е дозволена да се користи согласно препораките во внатрешното упатство за оваа категорија на деца на оваа возраст и додаде дека досега нема нус појави кај вакцинирани деца.
Бројот на вакцинирани во земјава надмина 400.000. На вакциналните пунктови во државата заклучно со завчера се вакцинирани 400.235 граѓани. Во државата вкупно се аплицирани 640.886 дози вакцини, а ревакцинирани се 240.651 граѓани. Бројот на лица кои досега изразиле желба за вакцинација преку веб платформата vakcinacija.mk е 494.389 граѓани.
Тим од здравствени работници вчера во штипскиот Затвор имунизираа 85 осуденици, кои пројавиле интерес да се вакцинираат против ковид-19.