Published: Tuesday, October 4, 2016 18:39
Демократскиот сојуз соопшти дека го поддржува мирниот протест пред Кривичниот суд во Скопје, кој ќе се одржи утре со почеток во 10,45 часот со цел да се поддржи Павле Богоевски, против кој се води постапка поради учество во протестите против одлуката на Ѓорге Иванов за аболиција на 56 лица, меѓу кои и носители на високи политички и државни функции.
„Цивилизациско право е да се протестира и да се искаже став и незадоволство од одредени состојби или одлуки и заради учество во ненасилни протести никој не сме да биде суден и осуден“, пишува во соопштението од партијата на Павле Трајанов.
„Шарената револуција“ денеска објави повик за протест пред Кривичниот суд, бидејќи како што се велат продолжуваат притисоците врз луѓето кои секојдневно протестираа и протестираат против овој режим и продолжуваат да се судат граѓани кои ја критикуваат власта додека криминалците шетаат слободно, уништуваат докази и траги од веќе сторени и вршат нови кримични дела.
„Обвинителството на Зврлевски го товари Павле за учество во толпа што ќе изврши кривично дело. Оваа, прва кривична пријава за боењето на симболите на криминалниот режим во Скопје е уште еден обид за обвинителството и судството од тефтерот на Горде да делат селективна правда. Павле ќе може да го судите само кога Груевски ќе седи на обвинителната клупа во соседната судница, пред навистина независен и непристрасен Суд“, пишува во повикот од Шарената револуција.