Општина Охрид во текот на денот почна со уривање на бетонската база на советникот на ДУИ, Нефи Усеини, откако во аудио разговорот што беше објавен вчера на Јутјуб се слуша како Александар Николоски му вели на Миле Јанакиески „да не се чепкаат неговите згради во Далјан оти тоа било дел од договор за избори“.
Акцијата, велат од Оштината, што почна денеска, ќе продолжи и во наредните денови и ја образложија со „објект што е изграден без било каква дозвола“.
Градежната механизација што е испратена на терен е насочена на отстранување на дивоизградените објекти долж езерото во охридската населба Далјан. Општина Охрид пред десетина дена почна со отстранување и на дивоизградените платформи, шанкови и плажи крај Охридското Езеро, акција за која, исто така, најави дека ќе продолжи и покрај времената мерка што ја донесе Уставниот суд во средата за забрана на уривањето.