Денеска и утре, Скопје ќе биде домаќин на осмиот Форум на граѓанско општество на Западен Балкан во организација на Европскиот економски и социјален комитет.
Меѓу говорниците на Форумот ќе бидат премиерот Зоран Заев, кој ќе го отвори настанот, Криста Швенг, претседател на Европскиот економски и социјален комитет, Оливер Вархеји, комесар за соседство и проширување, кој ќе се обрати виртуелно, како и Гаспер Довжан, државен секретар во Министерството за надворешни работи на Словенија.
На Форумот ќе се дискутира за начините за подобрување на процесот на пристапување – веродостојна ЕУ перспектива за Западен Балкан, пост-ковид закрепнување – предизвици и можности на Економскиот и инвестицискиот план за Западен Балкан и Заедничкиот регионален пазар.
Меѓу темите за кои ќе се разговара ќе бидат и придонесот на организициите од граѓанското општество (ОГО) за Зелената агенда и одржливиот развој на Западен Балкан како дел од пристапниот процес во ЕУ, како и состојбата на социјалниот дијалог и граѓанскиот простор на Западен Балкан.