Карпошани денеска во 17 часот под мотото „Стоп за згради“ ќе протестираат и ќе собираат потписи за да се запрат сите градежни активности на потегот од булеварите Илинден – 8. Септември –Кејот на вардар и улицата Љубљанска.
Овој простор кој е опфател во деталниот урбанистички план за Градска четврт 304, жителите бараат да се пренамени во површина со заштитена зелена зона. Во поканата за маршот граѓаните објаснуваат дека планот за градење е донесен нетранспарентно со големи пропусти во постапката и дека ја крши управната постапка за донесување на еден ваков план. Исто така, велат дека со овој план е загрозено правото на здрава животна средина.
„Сметаме дека е неопходно овој простор да биде претворен во Парк Шума која ќе допринесе за подобрување на состојбата со загадувањето и ќе го ублажи ефектот на неминовните климатски промени чие засилено дејство допрва ќе го осетиме, особено што во последниве години на територијата на општина Карпош се намалуваат зелените површини кои припаѓаат на Парк шумата Водно, а еден цел парк, Паркот на Толеранција, исчезна претворајќи се во болница. Зелениот појас ќе допринесе за намалување на концентрацијата на арсен и други тешки метали во воздухот. Затоа бараме најитно стопирање на секакви градежни активности и преиспитување на целокупната постапка. Стоп на загадувањето. Стоп на непромислена урбанизација без земање предвид на ефектот врз животната средина и на климатските промени. Сакаме паркови наместо згради, сакаме отпорен Карпош во време на климатски промени, сакаме здравје за нашите деца, а не смрт“, пишува во соопштението.
Денеска за чист воздух ќе маршираат и Коалицијата за чист воздух О2 и Првата детска амбасада во светот Меѓаши заедно со уште 18 граѓански, невладини организации денеска во 17 часот низ повеќе булевари во Скопје ќе одржат мировен марш за правото на чист воздух.
Почетна точка на акцијата е пред Владата, по што ќе се помине низ булеварот „Илинден“ и булеварот „8 септември“ каде учесниците ќе се спојат со партнерските граѓански организации „Ние сме Карпош 4“ и „Карпош 3“ кои исто така ќе имаат мирен протест.