Првиот голем тениски турнир во 2019 година носи и спектакл. Претпладнево во 09.30 часот по средноевропско време во Мелбурн е закажано машкото финале на Австралија опен. А, актери во него се Новак Ѓоковиќ и Рафаел Надал. Дуелот ќе биде 53 меѓусебен на Србинот и Шпанецот кои по 26 пат ќе играат за титула и по осми пат на гренслем турнирите.
На АТП турот во шега велат „дека е полесно да победите фаворит од типот на Ѓоковиќ, на Надал или на Федерер одошто да добиете комплимент од Матс Виландер“. Легендарниот шведски тенисер, кој со години веќе соработува со „Евроспорт“, се огласи во пресрет на тениската класика.
„Никогаш не сум го видел Надал со таков сервис и бекхенд удар какви што демонстрира во изминатите две недели во Мелбурн, но мој впечаток е дека Новак е во предност“, истакна Виландер.
Ѓоковиќ претпладнево ќе атакува по седми трофеј во Мелбурн во седмото финале. Надал, пак, е во блага предност во однос на моментно водечкиот на АТП листата кога во прашање се финалните натпревари на турнирите од големата четворка. Шпанецот води со 4:3 и тоа е една од статистичките категории во кои е во водство во дуелите со српскиот ас.
Што велат бројките? – Ѓоковиќ води со 27:25 во меѓусебните дуели со Надал кој, пак, рековме води со 4:3 во гренслем финалните средби. Но, гледајќи ги севкупно нивните финалните пресметки на АТП турот, билансот е на страна на Србинот (15:10).
Какви се прогнозите на дел од големите шампиони на тениската игра?
Род Лејвер вели „давам предност на Ѓоковиќ, без причина“ додека за Иван Лендл е „тешко да се одбере фаворит бидејќи двајцата ги гледам многу блиску“. Линдзи Девенпорт е типува на „Ѓоковиќ бидејќи е ментално посилен“, мислење што го дели и Пет Кеш. Рој Емерсон е на страна на Надал за, како што вели, „да го сочува мојот рекорд од шест титули на Австралија опен“. И повторно Виландер кој вели „Ѓоковиќ, затоа што е предобар и не можете да го добиете“.
Организаторот на турнирот сè уште не одлучил дали машкото финале ќе биде под затворен кров. Температурите во Мелбурн преку ден се блиску до 50. степен, па затоа и дилемите за овозможување на похумани услови за игра што веројатно ќе бидат отстранети пред самиот натпревар.
Надал беше на терен десетина минути повеќе од Ѓоковиќ на годишното издание на турнирот. Изминатите шест меча, Шпанецот ги реши за 12 часа и 11 минути за разлика од Србинот кој играше 11 часа и 59 минути. Надал игра со лева рака, Ѓоковиќ е деснак, Надал има 80 турнирски победи (17 гренслем титули), Ѓоковиќ има 72 АТП титули (14 на гренслем турнирите). Надал има 32 година, една повеќе од Ѓоковиќ и на крајот на краиштата во дело на занимливостите, Надал е со статус на професионалец од 2001 година, а Ѓоковиќ од 2003 година.