Рома го победи Лацио со 2:1 во најновото издание на популарното „дерби дела капитале“. Сите три гола во пресметката за фудбалска превласт во Вечниот град беа постигнати во второто полувреме. Диего Пероти обезбеди предност за „волчицата“ во 49 минута од пенал, а само четири минути подоцна му асистира на Раџа Најнголан за 2:0. Единствениот гол за „небесно-сините“ беше дело на Чиро Имобиле од белата точка во 72 минута.
Со идентичен резулат и Наполи го совлада Милан во вечерниот термин на „Сан Паоло“. Стрелци за наполитанците беа Лоренцо Инсиње во 33 минута и Пјотр Зелински во 73. по додавање од Дрис Мертенс. Се што успеаја да сторат „росонерите“ до крајот беше ублажување на поразот преку Алесио Ромањоли во првата минута од судиското надополнување.
Неделната програма во Серија А носи уште седум натпревари од 13. коло. Во пладневниот термин (12,30 ч.) ќе играат Кротоне и Џенова, за 15 часот се закажани дуелите Беневенто – Сасуоло, Сампдорија – Јувентус, СПАЛ – Фиорентина, Торино – Киево и Удинезе – Калјари, а од 20,45 ч. и средбата Интер – Аталанта. Колото ќе биде комплетирано во понеделник (20,45 ч.) со натпреварот Верона – Болоња.