Манчестер сити водеше на полувреме, Челзи се радуваше на крај. „Сините“ на Антонио Конте ги совладаа „граѓаните“ на Пеп Гвардиола со 3:1 во дербито на 14. коло во англиската Премиерлига и ќе останат лидери на табелата со 34 бода, четири повеќе од Ливерпул чии фудбалери утре му гостуваат на Борнмут.
Кејхил постигна автогол во финишот на првото полувреме на „Етихад“ за водство на Сити. Гостите возвратија по кам-бек од соблекувалната и во период од пола час го решија натпреварот. Диего Коста израмни во 60 минута, десет минути по него во листата на стрелци се впиша и Вилијан за пресврт што го потврди Азар по контранападот во 90 минута.
Манчестер сити го заврши мечот со двајца играчи помалку на теренот. Црвени картони во судиското продолжение добија Серхио Агуеро и Фернандињо по еден опасен старт на Аргентинецот врз Луис Фелипе.
Од 16 часот почнуваат уште пет средви од ова коло во Премиерлигата. Кристал Палас го дочекува Саутемптон, Стоук е домаќин на Барнли, шампионот Лестер ќе гостува кај Сандерленд, Тотенхем пред своите навивачи ќе игра против Свонси, а ВБА во Бирмингам ќе бара три бода во дуелот со Вотфорд. Последниот меч за денеска е меѓу Вест Хем и Арсенал од 18.30 часот.