Во организација на Клубот за спортови на вода „Охридски бранови 2008” денеска на Охридското Езеро ќе се одржи првиот Олимписки пливачки маратон во должина од десет километри.

Зад организацијата стои познатиот македонски пливач Александар Маленко. Маратонот ќе вклучува трка  во машка и женска конкуренција, каде ќе учествуваат 17 пливачи од Бугарија, Холандија, Словенија, Србија, Грција, Аргентина, Бразил, Италија, како и од нашата земја.

Од Македонија, на маратонот ќе настапат пливачите Александар Илиевски, чиј тренер е најдобриот македонски маратонец Томи Стефановски, како и Илија Стојановски и Андреј Стојановски.

Маратонот ќе се плива на најатрактивниот дел од езерото на патека покрај самиот Кеј „Македонија“, со старт на трката закажан точно на пладне, а првите пливачи на целта се очекува да пристигнат некаде два часа подоцна.

За регуларноста на трката ќе се грижат судии–делегати на Меѓународната пливачка федерација (ФИНА).

Интенција на организаторот е овој маратон како олимписка дисциплина да стане дел од официјалните натпревари вреднувани и бодувани од ФИНА. Тоа би значело дека на „Олимпискиот пливачки маратон“ во Охрид би се исполнувала норма за учество на Летните олимписки игри.

Александар Маленко

-ФИНА ќе го мониторира настанот со свој официјален делегат, како и 4 меѓународни судии. По самото завршување на маратонот, на завршната церемонија, ќе следува оценка од страна на делегатот на ФИНА и Македонскиот олимписки комитет. Таа заедничка оценка ќе биде и официјално проследена до комисијата на Светската пливачка федерација и Интернационалниот олимписки комитет (ИОК) кој заседава во Лозана, вели Александар Маленко, кој  на крајот на ноември ќе отпатува во Швајцарија и ќе присуствува на настанот по повод објавувањето на календарот на настани на ФИНА за 2018 година.

Маленко се надева дека успешно ќе ја мине оваа фаза, по што се надева за добивање лиценца за организација и на трките на 5 и 25 километри, кои се дел од олимписката програма, а преку нив се обезбедува и норма за учество на Светско и европско првенство.

Според него, организација на ваков настан ќе овозможи да се подигне квалитетот на имињата кои ќе настапуваат на маратонот во Охрид, што ќе придонесе и за спортска и туристичка промоција на овој наш најубав град.