Десет респираторни машини резервирани преку Програма за развој на Обединетите нации (УНДП) се распределени во девет болници низ земјава. Универзитетската Клиника за инфективни болести и фебрилни состојби доби две нови респираторни машини, а по една машина е доставена до Градската општа болница „8 Септември“ и Универзитетската Клиника за анестезија, реанимација и интензивно лекување (КАРИЛ). По една респираторна машина беше доставена до болниците во Кочани, Кавадарци, Прилеп, Тетово, Штип и Битола, соопштија од УНДП.
Во време на огромен пораст на глобалната побарувачка за респираторни машини и наддавање меѓу земјите, како што се посочува, УНДП резервираше 1.000 респираторни машини за земји во развој од кои десет за потребите и на Република Северна Македонија во борбата против епидемијата на коронавирусот.
„Новите респираторни машини ќе ги зголемат капацитетите на болниците за третман на пациентите со Ковид-19 кои имаат особено тешка клиничка слика, што ќе помогне во намалување на смртноста и во ублажување на последиците од епидемијата. Производителот на машините со модел Ventilator-Model VG7O е кинеската компанија Beijing Aeonmed Co., Ltd. Квалитетот на овој модел е проверен и потврден од СЗО, УНДП и Министерството за здравство“, потенцираат од УНДП.
Министерот Филипче изрази благодарност за досегашната соработка, додека постојаната претставничка на УНДП, Нарине Сахакјан ја потврди заложбата за поддршка на земјата во справување со епидемијата преку долгорочна соработка за зајакнување на капацитетите и опоравување од кризата предизвикана од Ковид-19.
Глобално, УНДП соработува со СЗО и агенциите на Обединетите нации во спроведување на интегриран пристап преку кои им помага на 170 земји и територии во справувањето со и опоравувањето од пандемијата. Интегрираниот пристап вклучува три компоненти: подготовка (зајакнување на здравствени системи), одговор (забавување на ширењето на вирусот) и опоравување (ублажување на социо-економските последици). УНДП ги мобилизираше сите ресурси за надминување на овој досега невиден предизвик, а сите критични процеси на организацијата се водат преку дигитални и виртуелни платформи со цел непречено функционирање во време на мерки за ограничување на движење и препораки за намалена физичка интеракција“, стои во соопштението.