Новоизбраниот претседател на САД, Доналд Трамп, огласувајќи се преку Твитер најави дека пензионираниот генерал на маринците, Џејмс Метис, е во сериозна конкуренција да стане дел од неговиот кабинет и да биде назначен за државен секретар за одбрана.
„Генералот Џејмс „Мед Дог“ Метис, кој е дел од кандидатите за секретар на одбраната, импресионираше денеска. Вистински генерал на генералите“, објави Трамп.
Иако официјалното претставување на Метис на оваа функција се уште не е комплетирано, Трамп бил импресиониран од портфолиото на пензионираниот генерал, а американските медиуми пишуваат дека тој е фаворит за влез во администрацијата на новиот претседател.
Метис над 40 години служеше во мировните сили на САД а водеше мисии во Авганистан и Ирак.
Прекарот „Мед Дог“ (Mad Dog – Лудо куче), го добива откако ги предводеше американските војници во Ирак во 2004 година во една од најкрвавите битки во Фалуџа, а неговото име стана контроверзно во јавноста кога изјави дека е „забавно да се убијат некои луѓе“ во 2005 година.
Помеѓу маринците важи за високо респектирана личност а одликуван е со четири ѕвезди.
Сепак, според американските принципи, за да служи во Пентагон, Метис мора да биде надвор од должност седум години пред да работи во една од најголемите воени институции, но бидејќи Републиканците се мнозинство во Конгресот и по победата на Трамп, ова би претставувало само формална пречка, пишуваат американските медиуми.
Националната безбедност на САД, Трамп досега најави дека ќе ја предводат Мајкл Флин, како национален советник за безбедност, Мајк Помпео како шеф на ЦИА и Џеф Сешнс како јавен обвинител.