Претседателот на Кривичниот суд Иван Џолев на денешниот брифинг со новинарите рече дека за судскиот службеник Горан Стаменковски е преземена постапка за утврдување на одговорност во врска со инцидентот со судијата Владимир Панчевски во Судот за прекршоци.
Посочи дека се земени изјави од Панчевски и двајцата судски службеници кои биле присутни на настанот за утврдување дисциплинска постапка.
– За однесувањето на судијата, може да расправа само Судскиот совет, рече Џолев.
Инцидентот меѓу поранешниот претседател на Кривичниот суд Владимир Панчевски и раководителот на секторот за човечки ресурси во Судот Горан Стаменковски се случи на 18 јануари годинава.
Судијата Панчевски до полицијата поднесе пријава дека на 18 јануари во 9:30 часот, во неговата канцеларија број 61 во одделението за прекршоци, влегол Стаменковски и почнал вербално да му се заканува, додека пак Стаменковски го тврдеше спротивното.
Ова не е прв судир на Панчевски и Стаменковски. Лани во септември Панчевски беше осуден за мобинг врз Стаменковски кога бил претседател на Кривичен.
Тужбата за мобинг против Панчевски, поранешниот раководител на секторот за човечки ресурси во Кривичниот суд, Стаменковски ја поднесе, бидејќи,Панчевски во подолг временски период го прераспоредувал Стаменковски на други работни позиции, го казнувал, а тужителот морал и да исполни норма која не постои во праксата на Судот, се вели во тужбата.